He hunah hian kum 2023-2025 chhunga President H. Lalthianghlima chuan thusawina hun neiin, MZP in a hma alo lak tawhna te rawn chhunzawm chho zel tur leh tuna UPSC coaching sponsor mekte pawh rawn ngaihven chhunzawm turin a chah a, zirlaite leh ram leh hnam tana hmalak chhohna turah hruaitu tharte duhsakna a hlan bawk.

Kum 2025-2027 chhunga atan President thar Dr.  C. Lalremruata pawhin thu sawiin, "MZP hi zirlaite tana innghahna tlak leh rin tlak a nih zual zel theihna turin hma lak a ni dawn a, Hnamdang (vai) dan lova rawn sumdawngte lakah leh an hming lo hawhtir tute chungah dan angin na takin action lak a nih theih nan hma kan la dawn a ni" a ti.

President chuan, "MZP hi Mizo Zirlai Pawl kan nih angin zirna kan ngai pawimawh dawn a, zirnaah kan let leh angai tak zet a ni", a ti. Mizoram chu India ram chhung state a ziak leh chhiar thiam awm tamna kan nih angin, All India Service leh Central service lamah inziah tlin tuma ṭan kan lak a ngai tak zet a, Mizoram chhungah sawrkar hna a van tawh avangin, hna latute fimkhur tur leh a tling leh a tlak te ngei chauh la turin President chuan thuneitute a ngen nghal a ni. 

Dr. C. Lalremruata chuan, Zirlai harsa te tanpuina turin Students Aid Fund siam a a ni dawn a, ram dang leh state danga an lo tih thin angin, zirlaite'n Placement an hmuh theihna turin hmalak a nih tur thu a sawi a, Mizo zirlai tam zawkin ram danga zir zawm theihna tur (Scholarship & Guidance) ngaihtuahpui turin chak taka hmalak an tum thu a sawi.

Hmun hrang hrang atanga Aizawl-a zirlai awmte’n, man tlawm zawk leh tha zawka zirna an chhunzawm theih na tur hmun changtlung ‘Zirlaite Hostel’ nei tura hmalakna kan neih mek chu chak lehzuala hmalak a nih tur thu a sawi bawk. 

MZP General Headquarters kum 2025-2027 chhunga hruaitute: President: Dr. C. Lalremruata; Vice President: Sanghmingthanga; General Secretary: C. Lalhmingsanga; Asst. General Secretary: Lalentlinga; Treasurer: Rothanliana; Finance Secretary: Nangsawmthang